by admin | September 9, 2021 5:54 am
പതിനൊന്നാമത് വല്ലാർപാടം
ബൈബിൾ കൺവെൻഷൻ
സമാരംഭിച്ചു.
വല്ലാർപാടം: ദക്ഷിണേന്ത്യയിലെ ചരിത്രപ്രസിദ്ധമായ വല്ലാർപാടം ബസിലിക്കയിൽ ഈ വർഷത്തെ മരിയൻ തീർത്ഥാടനത്തിനു് മുന്നോടിയായുള്ള വല്ലാർപാടം ബൈബിൾ കൺവെൻഷൻ വരാപ്പുഴ അതിരൂപതാ വികാരി ജനറാൾ മോൺ.മാത്യു കല്ലിങ്കൽ ദീപം തെളിയിച്ചു ഉത്ഘാടനം ചെയ്തു. സെപ്റ്റംബർ 12 വരെ നീണ്ടു നിലക്കുന്ന കൺവെൻഷൻ അണക്കര മരിയൻ ധ്യാനകേന്ദ്രത്തിലെ ഫാ. ഡൊമിനിക് വാളമ്നാൽ നയിക്കും. അതിരുപതാ പ്രൊക്ലൈമേഷൻ കമ്മീഷനും വല്ലാർപാടം ബസിലിക്കയും സംയുക്തമായി സംഘടിപ്പിച്ചിരിക്കുന്ന വചനശുശ്രൂഷ, ദിവസവും വൈകിട്ട് 4.30ന് ആരംഭിക്കുന്ന ജപമാല, ദിവ്യബലി എന്നിവയെ തുടർന്നു് രാത്രി 9.00 വരെയാണ്. സമാപന ദിവസമായ സെപ്റ്റംബർ 12 നാണ് ഈ വർഷത്തെ മരിയൻ തീർത്ഥാടനം. അന്നത്തെ ആഘോഷമായ ദിവ്യബലിയിൽ വരാപ്പുഴ അതിരൂപതാ മെത്രാപ്പോലീത്ത ഡോ.ജോസഫ് കളത്തിപ്പറമ്പിൽ മുഖ്യ കാർമ്മികത്വം വഹിക്കും. തുടർന്ന് അഭിവന്ദ്യപിതാവ് വിശ്വാസികളെ പരിശുദ്ധ വല്ലാർപാടത്തമ്മയ്ക്ക് അടിമ സമർപ്പണം നടത്തും.
കോവിഡ് മഹാമാരിയുടെ പ്രത്യേക സാഹചര്യം പരിഗണിച്ച് തിരുക്കർമ്മങ്ങൾ വല്ലാർപാടം ബസിലിക്കയുടെ യൂട്യൂബ് ചാനൽ, വരാപ്പുഴ അതിരൂപതയുടെ കേരളവാണി യൂട്യൂബ് ചാനൽ, ഫാ.ഡൊമിനിക് വാളമ്നാൽ ഒഫിഷ്യൽ യൂട്യൂബ് ചാനൽ എന്നിവയിലൂടെ തത്സമയം സംപ്രേക്ഷണം ചെയ്യുന്നതായിരിക്കും.
കോവിഡ് മാനദണ്ഡങ്ങൾ കർശനമായി പാലിച്ചുകൊണ്ട് ദേവാലയത്തിൽ നിന്നും സംപ്രേക്ഷണം ചെയ്യുന്ന തിരുക്കർമ്മങ്ങളിൽ, വിശ്വാസികൾ തങ്ങളുടെ ഭവനങ്ങളിലായിരുന്നു കൊണ്ട് അത്മനാ പങ്ക്ചേരുന്നുവെന്നതാണ് ബൈബിൾ കൺവെൻഷന്റേയും മരിയൻ തീർത്ഥാടനത്തിന്റേയും പ്രത്യേകത.
സെപ്റ്റംബർ 24 ന് നടക്കുന്ന വല്ലാർപാടത്തമ്മയുടെ തിരുനാളിന് മുന്നോടിയായി വിശ്വാസികളുടെ നേതൃത്വത്തിൽ വാട്ട്സാപ്പ് ഗ്രൂപ്പുകളിലൂടെയുള്ള വല്ലാർപാടത്തമ്മയുടെ അടിമസമർപ്പണ പ്രാർത്ഥനയും നടന്നു വരുന്നു.
റെക്ടർ ഫാ.ആന്റണി വാലുങ്കൽ, സഹവികാരിമാരായ ഫാ.ആൻറണി ജിബിൻ കൈമലേത്ത്, ഫാ.റോക്കി ജോസ്ലിൻ ചക്കാലക്കൽ, ഫാ.റിനോയ് കളപ്പുരക്കൽ അതിരൂപതാ പ്രൊക്ളമേഷൻ കമ്മീഷൻ ഡയറക്ടർ ഫാ.ആൻറണി ഷൈൻ കാട്ടുപറമ്പിൽ എന്നിവർ ചടങ്ങുകൾക്ക് നേതൃത്വം നല്കുന്നു..
Source URL: https://keralavani.com/%e0%b4%aa%e0%b4%a4%e0%b4%bf%e0%b4%a8%e0%b5%8a%e0%b4%a8%e0%b5%8d%e0%b4%a8%e0%b4%be%e0%b4%ae%e0%b4%a4%e0%b5%8d-%e0%b4%b5%e0%b4%b2%e0%b5%8d%e0%b4%b2%e0%b4%be%e0%b5%bc%e0%b4%aa%e0%b4%be%e0%b4%9f%e0%b4%82/
Copyright ©2024 official news channel of ARCHDIOCESE OF VERAPOLY, unless otherwise noted.