സെന്റ് കാര്‍ലോ അറ്റ് ദി ക്രോസ്’ വാഴ്ത്തപ്പെട്ട കാര്‍ലോ അക്യുട്ടിസിന്റെ പുതിയവെങ്കല പ്രതിമ അനാച്ഛാദനം ചെയ്തു.
- International News Latest News
admin
- 0
- 1 minute read
സെന്റ് കാര്‍ലോ അറ്റ് ദി ക്രോസ്’ വാഴ്ത്തപ്പെട്ട കാര്‍ലോ അക്യുട്ടിസിന്റെ പുതിയവെങ്കല പ്രതിമ അനാച്ഛാദനം ചെയ്തു.
സെന്റ് കാര്‍ലോ അറ്റ് ദി ക്രോസ്” വിശുദ്ധ പദവി പ്രഖ്യാപനത്തിന് മുന്നോടിയായി, അസീസിയില്‍ വാഴ്ത്തപ്പെട്ട കാര്‍ലോ അക്യുട്ടിസിന്റെ പുതിയവെങ്കല പ്രതിമ അനാച്ഛാദനം ചെയ്തു.
സെപ്റ്റംബര്‍ 7 ന് ലെയോ പതിനാലാമന്‍ പാപ്പ വിശുദ്ധനായി പ്രഖ്യാപിക്കുന്ന കാര്‍ളോ അക്യൂട്ടിസിനെ അടക്കം ചെയ്തിരിക്കുന്ന സെന്റ് മേരി മേജര്‍ ദേവാലയത്തിനു പുറത്തു നിര്‍മ്മിച്ചിരിക്കുന്ന 11 അടി ഉയരമുള്ള സെന്റ് കാര്‍ലോ അറ്റ് ദി ക്രോസ്” എന്ന് പേരിട്ടിരിക്കുന്ന പ്രതിമയുടെ ചിത്രങ്ങള്‍ സമൂഹ മാധ്യമങ്ങളില്‍ ഇതിനകം തന്നെ ലോക ശ്രദ്ധ നേടി കഴിഞ്ഞു.. കുരിശിന്റെ ചുവടെ ക്രിസ്തുവിന്റെ പാദത്തോട് ചേര്‍ന്ന് കാര്‍ളോ ഇരിക്കുന്നതും കാര്‍ളോയുടെ ഒരു കൈയില്‍ ലാപ്‌ടോപ്പ് പിടിച്ചിരിക്കുന്നതുമാണ് കലാസൃഷ്ടിയില്‍ ഒരുക്കിയിരിക്കുന്നത്. ലാപ്‌ടോപ്പിലെ സ്‌ക്രീന്‍ ഭാഗത്തായി യേശുവിന്റെ ശരീര രക്തങ്ങളുടെ ഘടനയും ഉള്‍ചേര്‍ത്തിട്ടുണ്ട്. കാനഡയില്‍നിന്നുള്ള തിമോത്തി ഷ്മാല്‍സ് എന്ന പ്രമുഖ കലാകാരനാണ് ഇത് ഒരുക്കിയിരിക്കുന്നത്.
കാര്‍ളോയുടെ പിറകിലുള്ള ബാഗില്‍ കവണ കിടക്കുന്നതു രൂപത്തില്‍ ദൃശ്യമാണ്. ഇതിന് പിന്നില്‍ തനിക്ക് ലഭിച്ച ഉള്‍ക്കാഴ്ചയുണ്ടെന്ന് അദ്ദേഹം പറയുന്നു. ‘ഞാന്‍ ഇതിന്റെ നിര്‍മ്മാണത്തില്‍ ഏര്‍പ്പെട്ടുക്കൊണ്ടിരിന്നപ്പോള്‍, ദാവീദിന്റേയും ഗോലിയാത്തിന്റെയും സംഭവം മനസില്‍ നിലനിന്നിരിന്നു. ക്രൈസ്തവ വിശ്വാസത്തെയും ആത്മീയതയെയും നിസ്സാരവല്‍ക്കരിക്കുന്ന മുഖ്യധാരാ മാധ്യമങ്ങളുടെ ഈ ‘ഗോലിയാത്തിനെ’ നേരിടാന്‍ ആധുനിക കാലത്തെ കവണ – അതായത് സാങ്കേതികവിദ്യ ഉപയോഗിക്കുന്ന ഈ ചെറുപ്പക്കാരന്‍’ എന്നു പറയുവാനാണ് ഇത് കൊണ്ട് ഉദ്ദേശിച്ചതെന്ന് തിമോത്തി പറഞ്ഞു.
അസീസ്സിയിലെ വിശുദ്ധ ഫ്രാന്‍സിസിനോടുള്ള ആദരവിന്റെ അടിസ്ഥാനത്തിലാണ് അസീസ്സിയില്‍ തന്നെ അടക്കം ചെയ്തിട്ടുള്ള കാര്‍ളോയുടെ രൂപവും കുരിശിനോട് ചേര്‍ത്തു നിര്‍മ്മിച്ചതെന്നും വാഴ്ത്തപ്പെട്ട അക്യുട്ടിസ് വിശുദ്ധ ഫ്രാന്‍സിസ് അസീസ്സിയെ വളരെയധികം സ്‌നേഹിച്ചിരുന്നുവെന്നും കലാകാരന്‍ പറഞ്ഞു. ഓഗസ്റ്റ് 15നാണ് രൂപം അനാച്ഛാദനം ചെയ്തത്. കാര്‍ളോയുടെ ശവകുടീരം സന്ദര്‍ശിക്കുവാന്‍ എത്തുന്ന ആയിരങ്ങളുടെ ശ്രദ്ധാകേന്ദ്രമായി മാറിയിരിക്കുകയാണ് ഈ രൂപം.
ദിവ്യകാരുണ്യ സാക്ഷ്യത്തിനായി ജീവിതം സമര്‍പ്പിച്ചവനാണ് വാഴ്ത്തപ്പെട്ട കാര്‍ലോ അക്കൂത്തിസ് . 2006 ല്‍ രക്താര്‍ബുദം ബാധിച്ച് 15 വയസ്സുള്ളപ്പോള്‍ മരിക്കുന്നതിന് മുമ്പ്, ലോകമെമ്പാടുമുള്ള ദിവ്യകാരുണ്യ അത്ഭുതങ്ങളുടെ ഒരു ഓണ്‍ലൈന്‍ ഡാറ്റാബേസ് സൃഷ്ടിക്കാന്‍ വാഴ്ത്തപ്പെട്ട അക്യുട്ടിസ് കമ്പ്യൂട്ടറുകളെക്കുറിച്ചുള്ളതന്റെ അറിവ് ഉപയോഗിച്ചു.
